प्रचण्डयात सभासदया न्ह्यस:
येँ (सन्ध्या टाइम्स)/एकीकृत नेकपा (माओवादी)या नायः पुष्पकमल दाहाल 'प्रचण्डं' कन्हय् जुइगु प्रधानमन्त्रीया निर्वाचनया निंतिं उम्मेदवारी बियादीगु दु। तर प्रचण्डया उम्मेदवारीयात कयाः वय्कःया हे पार्टीया सभासदत धाःसा सशंकित जुयाच्वंगु दु कि - प्रचण्डं हाकनं नं उम्मेदवारी लित काइगु खः ला?
प्रधानमन्त्री निर्वाचनया निंतिं उम्मेदवारी बी न्ह्यः पार्टी संसदीय दलया ज्याकू सिंहदरबारय् च्वंगु मुँज्याय् सभासदतय्सं प्रचण्डयात न्ह्यसःनं न्यंगु खः। प्रचण्ड थम्हं प्रधानमन्त्रीया उम्मेदवारी लित कयाः गनं एमाले अध्यक्ष झलनाथ खनालयात प्रधानमन्त्री जुइगु लँपु जकं चायेका बीगु खःला धइगु ग्याःचिकुं सभासदतय्सं थ्व न्ह्यसः तःगु दु ।
सभासदतय्सं थःपिं मध्ये आपाःथें एमाले त्वःताः वयागु जूगुलिं आः हाकनं वयात हे भोट बीमाल धाःसा थःपिं तयार मदुगु खँ धाःगु खः ।
