चीनया फोन सुविधां भारत सशंकित
येँ (सन्ध्या टाइम्स)/जःलाखःला देय् चीनं नेपालय् न्ह्यागु हे बांलाःगु ज्या या, उकिं भारतया कपाः स्याका हे बी। नेपाली जनतां दंक विदेशय् फोन याये फयेमा धकाः चीनया दूरसंचार कम्पनी ह्वावेइ टेक्नोलोजीपाखें देय्या थीथी थासय् जडान याःगु फोन सुविधायात भारतया गुप्तचरतय्सं शंकाया मिखां स्वःगु खँ 'टाइम्स अफ इण्डिया'या अनलाइन संस्करणं च्वःगु दु। चीनं नेपाः-भारत सीमाय् जडान याःगु अज्याःगु उपकरणपाखें निगुलिं देशया सीमाय् च्वंपिं मनूतय्सं याइगु खँल्हाबल्हा फुक्क चीनं टेप याइगु व जनताया दथुइ जुइगु खँल्हाबल्हापाखें भारतया आगं सीकेगु कुतः याःगु खः धकाः भारतीय गुप्तचरतय्सं निष्कर्ष पिकाःगु दु ।
अथे हे अनलाइन संस्करणं चीनं नेपाः व भारतीय माओवादीतय् दथुइ संवाद कायम याकेगु लागिं निगुलिं देय्या माओवादी कार्यकर्तातय्त चिनियाँ स्यनेगु ज्या यानाच्वंगु खँ नं च्वया हःगु दु ।
निगुलिं देय्या माओवादी कार्यकर्तायात चिनियाँ स्यना बिल धाःसा उमिसं चिनियाँ भासं हे संचार काल बिल याइगु व उकिं यानाः भारतीय गुप्तचरतय्त झंगः लाये फइगु खँ धाःगु दु। भारतीय गुप्तचरय् चिनियाँ भाय् सःपिं जनशक्ति मदुगु कारणं उकिया लबः कयाः चीनं नेपाः व भारतया माओवादीतय्त चिनियाँ स्यनेगु ज्या यानाच्वंगु खः धाःगु दु। नेपाःया माओवादीतय्सं सत्ता कब्जा याये मफयेवं चीनं नेपालय् थःगु हे ढंगं गतिविधि अप्वयेकाच्वंगु खँ नं उकी च्वयातःगु दु ।
