एनिमेशन फिल्मया धेंधेंबल्लाः जुइगु
माया एनिमेसनया ग्वसालय् नेपालय् नं न्हापांखुसी "वान फिल्म थ्री डी एनिमेसन एवार्ड च्यालेन्ज २०११" धेंधेंबल्लाः याइगु जूगु दु। उगु संस्थापाखें नकतिनि छगू पत्रकार सम्मेलन यासें उकिया जानकारी बिउगु खः ।
चीहाकःगु एनिमेशन चलचित्र प्रतियोगिता थ्वहे वइगु असोज ३ निसें कार्तिक ४ गते तक कुमारी क्यूएफएक्स सिनेमा हलय् जुइगु जानकारी ग्वसाः खलकं बिउगु दु।
पत्रकार सम्मेलनय् चलचित्र विकास बोर्डया अध्यक्ष अमर
गिरीं 'थ्री डी एनिमेसन एवार्ड २०११' या वेबसाइट नं उलेज्या यानादीगु खः। ज्याझ्वलय् न्ववासें वय्कलं एनिमेसन एवार्ड ग्लोबल टचया जमानाय् ल्याय्म्ह पुस्ताया निंतिं एतिहासिक अवसर जुइगु आशा प्वंकादिल। सरकारया ध्यानाकर्षण यासें वय्कलं थुगु ज्याय् मलेसिया उत्साहित जुयाच्वंगु खँ नं कनादिल ।
अथे हे म्यानेजिङ्ग डाइरेक्टर इन्द्रलाल बलामीं स्वदेशी व विदेशी एनिमेसनया नापं माया एनिमेसन एकेडेमिया स्थापना बारे कनादिलसा सेलेक्सन कमिटीया दुजः करुण थापा, एनिमेसन च्यालेन्ज कमिटीया दुजः विजयरत्न असंबरे, संयोजक रमेशमान श्रेष्ठपिंसं नं एनिमेसन चलचित्रया महत्व बारे कनादिल। ज्याझ्वलय् विदेशय् निर्माण यानातःगु व नेपालय् निर्माण याःगु माया एनिमेशन फिल्मत क्यंगु खः। लिसें एनिमेशन फिल्म गुकथं तयार याइ धइगु विधि नं अन न्ह्यब्वःगु खः।
उगु एनिमेशन धेंधेंबल्लाः कासाय् ब्वति काइपिं प्रतिस्पर्धीतय्सं खुलाया दुने फिल्म तयार यायेफुगु खँ धाःगु खः। अज्याःगु फिल्म २ मिनेटंनिसें ८ मिनेट तकया जुइफु। उत्कृष्ट फिल्मयात ५ लाख तका दां सिरपाः बीगु ग्वसाः दु। ग्वसाः खलकं धाः कथं न्हाप लाःगु फिल्म अन्तर्राष्ट्रिय एनिमेसन फिल्म महोत्सवय् ब्वति कायेके छ्वइ ।
