मिनि क्यासिनो तत्काल बन्द यायेत लेखया निर्देशन
व्यवस्थापिका संसद अन्तर्गतया सार्वजनिक लेखा समितिं मिनि क्यासिनो तत्काल बन्द यायेत सरकारयात निर्देशन ब्यूगु दु । समितिं पर्यटन मन्त्रालयं ब्यूगु मिनी क्यासिनोया इजाजत गैर कानुनी जूगु ठहर यासें अज्याःगु क्यासिनो तत्काल बन्द यायेत निर्देशन ब्यूगु खः ।
थौं सुथय् च्वंगु लेखा समितिया मुँज्यां बिना छुं ऐन क्यासिनात संचालनय् दुगु धासें तत्काल ऐन दयेकेगु ज्या सुरु यायेत नं निर्देशन ब्यूगु दु । नापं अर्थ व गृह मन्त्रालयया सहमति कयाः झिंन्यान्हुया दुने क्यासिनो संचालन सम्बन्धी कार्यविधि तयार यायेत नं धाःगु दु ।
अथेहे लेखा समितिं क्यासिनोयात राजधानीं पिने छगू निश्चित थासय् यंकेगु प्रक्रिया सुरु यायेत पर्यटन मन्त्रालययात निर्देशन नं ब्यूगु दु ।
मुँज्याय् पर्यटन मन्त्रालयया छ्याञ्जे किशोर थापा, अर्थया रामेश्वर खनाल व गृहया गोविन्द कुसुम नापं प्रहरी महानिरीक्षक रमेशचन्द्र ठकुरीया नं ब्वति दुगु खः ।
