एमालें उम्मेदवारया खँ थौं क्वःछीगु
येँ (सन्ध्या टाइम्स)/प्रधानमन्त्रीया चुनावया नितिं उम्मेदवारी बीत थौं च्वनीगु एमालेया केन्द्रीय कमिटीया बैठकं थःपिनिगु उम्मेदवारीया विषयसं खँ क्वःछिइगु जूगु दु।
प्रधानमन्त्री ल्ययेगु नितिं जुइगु चुनाव कथं कन्हय् उम्मेदवारया नां दर्ता यायेमाःगु अले कंस चुनाव जुइगु जुयाः अथे एमालें थौं थःपिनिगु उम्मेदवारीया बारे खँ क्वःछीत्यंगु खः। पार्टीया केन्द्रीय ज्याकू बल्खुइ सःतातःगु उगु बैठकं खँ क्वःछिइ धुंकाः एमालें मेमेगु दलया नेतातलिसे नं सहलह ब्याकी धाःगु दु ।
एमाले दुने संस्थापन पक्षं उम्मेदवारी बारे यानातःगु न्हापाया हे निर्णययात यथावत तयेमाः धकाः अडान तया वयाच्वंगु दु। न्हापाया निर्णय धायेबलय् पार्टीया अध्यक्ष झलनाथ खनाल हे उम्मेदवार यायेमाः धकाः धाःगु खः।
अथे हे पार्टी स्थायी समितिया नेता केपी शर्मा ओली व प्रधानमन्त्री माधवकुमार नेपाल पक्षधर नेतातय्सं धाःसा नेपाली कांग्रेसयात समर्थन यानाः वनेमाः धकाः धया वयाच्वंगु दु ।
