कांग्रेसया नेतात स्वंगू गुटय् विभाजित
येँ (सन्ध्या टाइम्स)/प्रधानमन्त्रीया उम्मेदवारया विषयसं वरिष्ठ नेता शेरबहादुर देउवां थःगु पक्षया नेता व सांसदतय्त भेला यायेवं नेपाली कांग्रेसय् गुटबन्दी अप्वयावःगु दु ।
पार्टीया सभापति सुशील कोइरालां न्हापाया हे निर्णय कथं संसदीय दलया नेता रामचन्द्र पौडेल हे उम्मेदवार जुयादी धकाः धयादीवं नेता देउवां उकियात कयाः आपत्ति प्वंकुसें थःगु पक्षया नेता व सांसदतय्त भेला यानाः सहलह यानादीगु खः। छखे देउवां भेला यानादीगु दुसा मेखे पार्टीया सभापति कोइरालां धाःसा केन्द्रीय दुजलय् शेरबहादुर देउवा पक्षधरया छम्ह जक नेता विमलेन्द्र निधि बाहेक मेपिं च्याम्ह थःगु पक्षया नेतातय्त मनोनित यानादीवं कांग्रेसय् गुटबन्दी झन झन तच्वयावःगु दु धकाः कांग्रेसया छम्ह नेतां धयादीगु दु। थ्व हे दथुइ नेता देउवां प्रधानमन्त्रीया उम्मेदवारया सवालय् हाकनं बिचाः यायेमाः धकाः माग यानाः थःगु पक्षया सांसदतय्गु ल्हाःचिं मुंकेगु तयारी यानादीगु दु। अथे देउवां यानादीगु भेलां यानाः गुटबन्दी यात धकाः कोइराला पक्षं द्वपं बिउगु दुसा मेखे कोइरालां थः मनूत जक मनोनित यानाः पार्टीयात गुट कथं चले यायेत्यन धकाः देउवा पक्षं द्वपं बिउगु दु। उगु हे कथं कोइरालां महाधिवेशनया चुनावय् बूपिंत पार्टीया लाइनया अःखः मनोनित यात धकाः मेगु छगू पुचलं असन्तुष्ट प्वंकाः आः याकनं हे महासमितिया बैठक सःतेत इनाप याइगु जूगु दु। कोइरालां महाधिवेशनय् बूपिं विमलेन्द्र निधि, रामकृष्ण ताम्राकार, भीमबहादुर तामाङ, नरहरी आचार्य, पद्मनारायण चौधरी नापं यानाः गुम्हेसित मनोनित याःगु खः ।
