सीम्ह थुनेगु खँय् पशुपतिइ ल्वापु
येँ (सन्ध्या टाइम्स)/सीम्ह थुनेगु चलन दुपिं किराँत समुदाययात पशुपतिया जंगलय् सीम्ह थुनेगु अनुमति मबिउगु खँयात कयाः म्हिगः येँय् दुपिं किराँत समुदायं सीम्ह थुने दयेमाः धकाः माग यासें प्रदर्शन यात। उगु प्रदर्शनय् प्रहरीं हस्तक्षेप याःगुलिं निगू पुचःया दथुइ ल्वापु जुल ।
पशुपतिया जंगलय् इसाई व किरातीतय् सीम्ह थुनेगु लागिं बिस्कं थाय् त्वःता तःगु दु। तर अन धमाधम सीम्ह थुथुं आः थुनेगु थाय् हे मंत धासें पशुपति विकास कोषं अन इसाई व किराती धर्मावलम्बीतय्त सीम्ह थुने मबीगु निर्णय यायेवं किरात समुदायं थ्व विरोध ज्याझ्वः न्ह्याका हःगु खः ।
म्हिगःया प्रदर्शनय् किरात धर्मावलम्बीतय्सं उगु लागाय् चक्का जाम समेत याना बिउगु खः। उकियात चीकेगु लागिं प्रहरीं कुतः याःबलय् प्रहरीं सभासद् सुदन राई, राजकुमार राई सहित झिंन्याम्ह स्वयां अप्वः प्रदर्शनकारीयात ज्वना यंकूगु दु। ल्वापु नियन्त्रण यायेगु लागिं प्रहरीं अन निगू शेल अश्रुग्याँस नं प्रहार याःगु खः ।
किरात समुदायं पशुपति लागाय् म्हीग सीम्ह हे लँय् तयाः प्रदर्शन याःगु खः। उमिसं लँय् सीम्ह तयाः प्रदर्शन यायेवं अन चक्का जाम जूगु खःसा निघौ लिपा उमिसं अन सीम्ह अथें तुं लित ज्वना वंगु खः ।
पशुपति लागाय् सीम्ह थुने मबीवं इसाई धर्मावलम्बीतय्सं थुनेगु पलेसा च्याकेगु हे शुरु यायेधुंकूगु दु। तर किरात समुदायं धाःसा च्याकेगु मखु, थुनेगु हे अधिकार दयेमाः धकाः माग यानाच्वंगु दु। थुकियात कयाः म्हिगः उमिसं प्रधानमन्त्रीयात नं छगू ज्ञापनपत्र बीधुंकूगु दु ।
