माओवादी नेतातय् नांमय् ठगी याइम्हेसित ज्वन

एकीकृत नेकपा (माओवादी)या वरिष्ठ नेतातय् नामं थीथी बैंकं ठगी यानाच्वम्ह इश्वरीप्रसाद पोखरेलयात प्रहरीं ज्वंगु दु ।

महानगरीय प्रहरी अपराध महाशाखाया पुचलं प्युठानया पोखरेलयात येँया कालिमाटीं मंगलवाः ज्वंगु खः । पुलाम्ह भारती सेना पोखरेलं थीथी बैंक ३० लख स्वयां अप्वः ध्यबा ठगी याःगु खँ प्रहरीं धाःगु दु ।

पोखरेलं माओवादी नेतात जनार्दन शर्मा, नेत्रविक्रम चन्द, अखिल (क्रान्तिकारी)या नायः हिलमा शर्मा लगायतया मखूगु नागरिकता दयेकाः किस्ट, मध्य पश्चिमाञ्चल ग्रामिण विकास, कर्णाली व एनएमबी बैंकय् खाता चायेकाः ठगी यानावयाच्वंगु खः ।

पोखरेलं माओवादी जनयुद्धया इलय् थःत माओवादीं अपहरण यायेवं थःत जागिरपाखें लिकाःगु धासें उकिया हे बदलाय् माओवादी नेतातय् नामं ठगी याना वयागु धाःगु दु ।