एमाले पाखें प्रधानमन्त्रीया उम्मेदवारय् खनाल

संसदया निर्वाचनय् झिंखुक्वः तक तटस्थ च्वंगु नेकपा (एमालें) हानं जुइत्यंगु बहुमतीय प्रणालीया निर्वाचनय् थःगु पार्टी पाखें उम्मेदवार घोषणा याःगु दु । एमालें पार्टी नायः झलनाथ खनालयात प्रधानमन्त्रीया उम्मेदवार दयेकेगु निर्णय याःगु दु ।

एमालेया थौं च्वंगु केन्द्रीय कमिटीया मुँज्याय् पार्टी वरिष्ठ नेता केपी शर्मा ओलीं खनालया नां प्रस्ताव यानादीगु खःसा उकीयात प्रधानमन्त्री माधवकुमार नेपालं समर्थन यानादीगु खः । मुँज्यां सर्वसम्मतिं खनालया नांमय् समर्थन याःगु खः ।

अथेहे मुँज्यां बहुमतीय प्रणाली पाखें जुइगु प्रधानमन्त्री निर्वाचनय् पार्टी नायःया नां प्रस्ताव याःसां लिप्पांगु ई तक सहमतिय सरकारया निंतिं कुतः यायेगु धाःगु दु ।