वैकल्पिक व्यवस्था मजुतले पशुपतिइ हे सिम्ह ल्हाके दइगु

किरती समुदायतय्सं मेगू वैकल्पिक व्यवस्था मदुतले सिम्ह पशुपति क्षेत्रया श्लेषमान्तक जंगलय् हे ल्हाके दइगु जूगु दु ।

प्रधानमन्त्री माधवकुमार नेपाल व किराती समुदायया प्रतिनिधित दथुइ थौं जूगु वार्ताय् मेगू व्यवस्था मजुतले श्लेष्मान्तक जंगलय् हे सिम्ह ल्हाके दइगु सहमति जूगु खः । उगु इलय् प्रधानमन्त्रीं मेगू वैकल्पिक व्यवस्था यायेत सरकारं पहल यायेगु धासें आःया निंतिं उगु हे थाय् छयलेत उजं बियादीगु खः ।

प्रधानमन्त्रीया ज्याकू सिंहदरवारय् जूगु वार्ताय् किराँत समुदायया प्रतिनिधि, आदिवासी जनजाति महासंघया प्रतिनिधि व किराँत सभासदतय् ब्वति दुगु खः ।

प्रधानमन्त्री नेपाल नाप वार्ता जुइ न्ह्यः कराती समुदायं थौं नं येँया गौशाला क्षेत्रय् प्रदर्शन याःगु खः । प्रदर्शनया झ्वलय् प्रदर्शनकारी व प्रहरी दथुइ तनाव तकं जूगु खः । प्रदर्शनय् प्रहरीं बल छ्यःगु इलय् स्वम्ह प्रदर्शनकारीत घाःपाः जूगु खः ।

उखे तम्वःपिं प्रदर्शनकारीतय्सं गौशाला चोकय् प्रदर्शन यायेगु झ्वलय् स्वंगः गाडी तछ्यानाः ब्यूगु खः । तोडफोड याःगु गाडीया ताःचा तकं प्रदर्शनकारीतय्सं यंकूगु खँ पीडित पक्षं धाःगु दु ।