देय् आः तकया हे कमजोर अवस्थाय् : प्रधनमन्त्री
प्रधानमन्त्री माधवकुमार नेपालं देय् आः तकया हे कमजोर अवस्थाय् थ्यंगु खँ धयादीगु दु ।
नेपाल नगरपालिका संघं थौं येँय् याःगु 'नेपाःया संघीय संरचनाय् प्रस्तावित स्वायत्त मेट्रो सिटी' विषयक अन्तक्रिया ज्याझ्वलय् प्रधानमन्त्री नेपालं देय् आः तकया हे कमजारे अवस्थाय् लाःगुलिं नेपालय् विदेशीतय् चलखेल अप्वःगु धयादिल ।
वय्कलं नेपाः कमजोर जूगुलिं गरीबि व बेरोजगारी व्याप्त जूगु धयादिल । थंज्याःगु हे कारणं विदेशीतय्सं नेपाःया सार्वभौम व अखण्डताय् तकं लिच्वः लाइ कथं ज्या यानाच्वंगु स्वीकार नं प्रधानमन्त्री नेपालं यानादिल ।
प्रधानमन्त्री नेपालं स्थानिय निकाय जनप्रतिनिधि विहीन जूगुलिं स्थानिय क्षेत्रय् अधिकार व साधन श्रोतया दुरुपयोग जुयाच्वंगु धयादिल । वय्कलं दुरुपयोगया अन्त्य मजुइकं जन अपेक्षित विकास जुइमफइगु धासें श्रोत साधनया दुरुपयोग याइपिंत तत्काल कारवाही यायेमाःगु बिचाः प्वंकादिल ।
ज्याझ्वलय् राष्ट्रिय योजना आयोगया न्वकू डा. जगदिशचन्द्र पोखरेल, सभासत नविन्द्रराज जोशी, रत्ना गुरुङ लगायतं स्थानीय सरकारं जनतायात वास्तविक सरकारया अनुभुति जुइगु ज्या यायेमाःगु खँ धयादीगु खः ।
