संवैधानिक समितिलय् कन्हय् निसें विवादित विषयस सहलह
संविधानसभा अन्तर्गत संवैधानिक समितिं न्हूगु संविधानया मस्यौदा तयार यायेत दलत दथुइ कच्वं जूगु ८३गू बुँदाय् कन्हय् निसें नियमित रुपं सहलह याइगु जूगु दु ।
संवैधानिक समितिया थौं च्वंगु मुँज्यां दलत दथुइ दुगु विवादित विषय मध्ये कन्हय् च्वनीगु न्हापांगु मुँज्यां शासकीय स्वरुपय् दुगु विवादया बारे सहलह याइ । च्याला लिपा न्हय्गू विषयगत समितिं छ्वःगु प्रतिवेदनय् सहलह यायेत संवैधानिक समितिया मुँज्या च्वंगु खः ।
मुँज्यां दलत दथुइ सहमति जूगु बुँदा व सहमति जुइमफयाच्वंगु बुँदाय् सहलह यानाः न्हूगु संविधानया प्रारम्भिक मस्यौदा तयार याइगु ज्याझ्वः दु । संवैधानिक समितिया सभापति निलाम्बर आचार्यं विवादित ८३गू बुँदाय् दलतय् बिचाः स्वयां संवैधानिक समितिलय् सहलह यानाः समितिया बिचाः कथं तयार यायेगु धयादिल ।
संविधानसभा पाखें ८३गू विवादित विषय सहित विषयगत समितिया प्रतिवेदन प्राप्त जुइवं मस्यौदाया खाका तयार यायेगु प्रक्रिया न्ह्याकूगु खः ।
