यल मंकाः खलःया नायः किरण
यल (सन्ध्या टाइम्स)/यलया नेपालभाषा मंकाः खलःया न्हूम्ह नायः कथं किरण शाक्य निर्वाचित जूगु दु। मंकाः खलःया म्हिगः बहनी क्वचाःगु झिंछक्वःगु तःमुँज्यां न्हूगु नेतृत्व ल्यःगु खः ।
नायः पदया नितिं उम्मेदवार जुयादीपिं मध्ये किरण शाक्य ९७ मत कयाः त्याःगु खःसा वय्कःया प्रतिद्वन्द्वी शाक्य सुरेनं ९१ मत कयादीगु खः। तःमुँज्यां दुजलय् चमेली शाक्य, चतुर ब्यञ्जनकार, रमा तुलाधर, बाबुराजा महर्जन, हरिबहादुर कर्माचार्य, ज्ञानबहादुर महर्जन, केशव महर्जन, शैलेश बहादुर प्रधान, कीर्तिलवानन्द जोशी, काजिरत्न शाक्य, सुरेन्द्र महर्जन व ऋषि प्रसाद श्रेष्ठ त्याःगु खः। अथे हे विधान कथं निर्वतमान नायः सुरेश प्रधान नं दुजः जुयादीसा मेम्ह छम्ह मनोनित याइ। न्हूगु ज्यासना पुचःया याकनं हे बैठक च्वनाः पदाधिकारी ल्ययेगु ज्या याइगु खँ मंकाः खलःया न्हूम्ह नायः शाक्यं धयादीगु दु ।
