माओवादी मजदुर संगठन तज्याइगु संभावना
येँ (सन्ध्या टाइम्स)/एकीकृत माओवादीया भातृ संगठन अखिल नेपाल ट्रेड युनियन महासंघ औपचारिक रुपं हे तज्याइगु अवस्थाय् थ्यंगु दु ।
महासंघया अध्यक्ष सालिकराम जमरकट्टेलं न्ह्यःनेलाःथे चन्दा कायेगु, आर्थिक हिनामिना याःगु, मनोमानी कथं संगठन चले याःगु, ब्यागलं बिचाः तइपिं पदाधिकारीतय्त पेशेवर खेलाडी हयाः आक्रमण याःगु द्वपं बियाः उपाध्यक्ष बद्री बजगाइँ पक्षधरं समानान्तर न्हूगु संगठन दयेकेगु तयारी याःगु दु ।
पार्टीया अध्यक्ष प्रचण्ड लिक्क लाःम्ह जमरकट्टेलं रेष्टुरेन्ट नापं क्यासिनोपाखें चन्दा कायेगु नापं आर्थिक अनियमितता याःगु बजगाइँ पक्षधरया द्वपं दु। उपाध्यक्ष बजगाइँ मोहन बैद्य पक्षधर धकाः नालातःगु दु। छुं ई न्ह्यःनिसें हे संगठन संचालनयात कयाः तःक्वःमछि विवाद जुयाच्वंगु खः। वंगु शनिवाः यलय् ला बजगाइँ पक्षधरं जिल्लास्तरीय समानान्तर समिति तकं दयेकेगु ज्या याःगु दु। उगु ज्याझ्वलय् माओवादीया पोलिटब्युरो दुजः पम्फा भुसाल, कुमार दाहाल, दिलिप प्रजापति उपस्थित जूगु खःसा उखे संस्थापन पक्षं धाःसा खन्ना गार्मेन्टय् ब्यागलं कथं याःगु भेलाय् बर्षमान पुन उपस्थित जूगु खः। पार्टीया केन्द्रय् अध्यक्ष प्रचण्ड व उपाध्यक्ष बैद्य छगू हे धारय् जूसां मजदुर संगठनय् धाःसा बिवाद जुयाः उपाध्यक्ष बैद्य व डा. बाबुराम भट्टराई पक्षधरत छप्पँ जुयाच्वंगु दु ।
मजदुरया अध्यक्ष जमरकट्टेलया बदमासीयात कयाः तःक्वःमछि हे पार्टीया हेडक्वाटरय् उजुरी याःसां नं सुनुवाई मजूगुलिं हे अथे बजगाइँ पक्षधरतय्सं समानान्तर संगठन दयेकेगुपाखे कुतः याःगु खँ मजदुनेतातय्सं धयादीगु दु ।
