अमेरिकाय् 'माया' क्यनीगु
नेपालभाषाया लोकंह्वाःगु फिल्म 'माया' आः अमेरिकाय् क्यनीगु जूगु दु। अमेरिकाय् च्वंपिं नेवाःतय्गु संस्था नेवाः अर्गनाइजेशन अफ अमेरिकापाखें अन च्वंपिं नेवाःतय्त क्यनेगु ताः तयाः थ्व प्रदर्शन यायेत्यंगु खः।
उगु संस्थापाखें थ्वहे वइगु अप्रिल १० तारिख कुन्हु अमेरिकी राजधानी वाशिंगटन डीसीया मेट्रोपोलिटन एरियाय् च्वंगु सिनेमा आर्ट थेटरय् थ्व प्याखं क्यनेत्यंगु खः ।
थुकिया निंतिं टिकटया मू १० डलर तःगु दु। प्याखं स्वये इच्छुकपिंसं आः हे टिकट बुक यायेत नं ग्वसाः खलकं इनाप याःगु दु। अमेरिकाय् क्यनीगु 'माया'या लागिं ग्वसाः खलकं बिस्कं पोष्टर नं डिजायन याःगु दु ।
ग्वसाः खलकं अमेरिकाय् च्वंपिं नेवाःतय्त नेवाः कला, संस्कृतिलिसे सतिका तयेगु ताः तयाः थ्व स्वयां न्ह्यः नं नेवाः फिल्म क्यनेगु ज्या यायेधुंकूगु दु ।
