निषेधाज्ञाया अवज्ञा यासें प्रदर्शन
माओवादी भातृ संगठन अखिल नेपाल महिला संघ (क्रान्तिकारी)या कार्यकर्तातय्सं राष्ट्रपति ज्याकूया न्ह्यने स्थानीय प्रशासनं तयातःगु निषेधाज्ञा अवज्ञा यासें प्रदर्शन याःगु दु ।
राष्ट्रपितं संवैधानिक 'कु' याःगु द्वपं ब्यूसें क्रान्तिकारी महिलातय्सं निषेधाज्ञा अवज्ञा याना प्रदर्शन याःगु खः । प्रहरीं प्रदर्शनकारीतय्त पनेत स्व:सां प्रहरीया घेरा तोडे यानाः प्रदर्शन याःगु खः । राष्ट्रपति डा. रामवरण यादवं जननिर्वाचित सरकारया निर्णय विरुद्ध प्रधानसेनापतियात पदय् च्वनेत निर्देशन ब्यूगु धासें राष्ट्रपतिया पलाः लितः कायेत माग यासें माओवादीया भातृ संगठन नं विरोध यानाः वयाच्वंगु खः ।
निषेधाज्ञा तोडे याना प्रदर्शन यायेधुंकाः याःगु कोण सभायात सम्बोधन यासें माओवादी सभासद जयपुरी घर्तिं राष्ट्रपितं पलाः मिभंकूतल्ले आन्दोलन जारी हे जुयाच्वनीगु धयादिल ।
