डीएसपीया आत्महत्याय् 'कर्लगर्ल'या ल्हाः
येँ (सन्ध्या टाइम्स)/छुं दिं न्ह्यः जक येँया बसुन्धराय् आत्महत्या याःम्ह प्रहरीया डीएसपी कन्चन थापां पेशेवर बेश्याया जालय् लानाः आत्महत्या याःगु खुलासा जूगु दु। आत्महत्याया इलय् थापानाप हे दुम्ह खोपकुमारी अधिकारीयाके बयान कायेगु झ्वलय् प्रहरीं उगु खँ पत्ता लगे याःगु खः। अधिकारी ग्राहकतय्सं फोन याना हयेवं उमिगु छेँय् हे वनेगु कथंया यौन ब्यवसाय संचालन यानाच्वंम्ह खः ।
अधिकारीं न्हापां थः डीएसपीया कलाः खः धकाः दावी याःगु खःसां अन्ततः थः पेशेवर यौन व्यवसायी हे खःगु नापं थःगु सञ्जाल भारतंनिसें सिंगापुर तक दुगु खँ नं स्वीकार याःगु दु। प्रहरी नियन्त्रणय् दुम्ह खोपकुमारीं थम्हं नेपाःनिसें भारत, थाइल्याण्ड, सिंगापुरया थीथी शहरय् तकं नेपाःमि मिस्त छ्वयाच्वनागु खँ नं स्वीकार याःगु दु। अधिकारीया सञ्जालय् २० म्हं मल्याक मिस्त संगठित जुयाच्वंगु व उपिं सम्भ्रान्त परिवारयापिं तकं दुगु खँ नं प्रहरी अनुसन्धानं सीकूगु दु ।
रसुवाया भोर्ले गाविस वडा नं. ९ स छेँ दुम्ह २४ दँया खोपकुमारी व डिएसपी थापा थ्यंमथ्यं प्यदँ न्ह्यःनिसें सम्पर्कय् दुगु व बसुन्धाराय् छेँ बालं कयाः नापं च्वना वयाच्वंगु खः। थापां खोपकुमारीलिसे इहिपा यायेगु ग्वसाः नं ग्वःगु खः। तर अधिकारीया मोबाइलय् भारतया कर्नाटक राज्यया पुलांम्ह मन्त्री सुरेन्द्रसिंह राठौरनाप सहवास यानाच्वंगु अश्लील क्लिप नापं लुया वयेवं डीएसपी थापां निराश जुयाः आत्महत्या याःगु खँ प्रहरी अनुसन्धानं सीकूगु दु ।
