शहिद दिवसया झ्वलय् शहिदत लुमंकल
देशया सुखद भविष्यया लागि थःगु प्राणया आहुति बियादीपिं वीर शहिदतय्गु लुमन्तिइ थौं देय्न्यंक थी थी ज्याझ्वः यासें शहिद दिवस हन ।
शहिद दिवसया झ्वलय् शहिद सप्ताह मूल समारोह समितिपाखें थौं लैनचौरय् च्वंगु शहिद पार्कय् विशेष ज्याझ्वः याःगु दु । उगु ज्याझ्वलय् प्रधानमन्त्री माधव कुमार नेपाल लिसें मन्त्रीत सुरक्षा अंगया प्रमुखत व सरकारी अधिकारीतय्गु उपस्थिति दुगु खः । शहिद दिवसया झ्वलय् थौं सुथय नसंचा उलेगु व हिदान ज्याझ्वः नं जुल ।
वि.सं. १९९७ साल माघ १० गते शुक्रराज शास्त्रीयात तत्कालिन जाहाँनिया राणा शासनया अन्याय व अत्याचारया विरोध याःगुलिं मृत्युदण्ड बिउगु दिनं निसें शहिद सप्ताह शुरु जुइगु खःसा थ्वहे झ्वलय् धर्मभक्त माथेमायात स्याःगु सिफल, गंगालाल श्रेष्ठ व दशरथ चन्दयात गोलिं कयेका स्याःगु शोभा भगवतीइ श्रद्धांजली प्वंकेगु ज्या जूगु खः ।
थ्वहे दिवसया झ्वलय् थौं राष्ट्रपति डा. रामवरण यादवं छगू सन्देश बियादिसें शहिदतय्गु म्हगस प्रतिविम्वित जुइकथंया संविधान च्वयाः शहिदतय्गु सम्मान यायेमाःगु बिचाः प्वंकादीगु दु ।
