कोशी ब्यारेज आकाझाकां बन्द
येँ (सन्ध्या टाइम्स)/भारतं शनिवाः निसें आकाझाकां कोशी ब्यारेज बन्द याना बिउगुलिं लः बाः वने मफयाः ब्यारेजं लिउने नेपाःया भूभागय् पिनातःगु छ्व बाली नष्ट जूगु दु ।
भारतया राष्ट्रिय राजमार्ग अन्तर्गत विहारया भटिनियाया कोशी खुसिइ दयेकाच्वंगु ताँ ढलान यायेमाःगुलिं धइगु त्वहचिनाः भारतया जल संशाधन मन्त्रालयया निर्देशन कथं शनिवाःनिसें कोशी ब्यारेजया फुक्कं लुखा बन्द याःगु खः ।
ब्यारेज बन्द जुयाः लः बाः वने मफुगुलिं सप्तरी व सुनसरीया कोशी ब्यारेजया पूर्वपाखेया भूभाग फुक्कं लखय् डुबे जूगु खः। लः नियमित रुपं बाः वने मफयेवं कोशीया पूर्व�उत्तर लागाय् च्वंगु नेपाली जनताया सलंसः बिगाहा बुँइ पिनातःगु छ्व बाली लखय् डुबे जूगु खँ स्थानीय किसानतय्सं धाःगु दु। थुकियात कयाः नेपाः सरकारं धाःसा आः तक छुं धाःगु मदुनि ।
