सत्तामोहया कारणं देय् अस्तव्यस्त
उप-प्रधानमन्त्री नापं भौतिक योजना मन्त्री विजय कुमार गच्छेदारं मू मू स्वंगू दलया सत्तामोहया कारणं देशं गति कायेमफूगु नापं स्वंगू दलया स्वार्थया कारणं देय् अस्तव्यस्त जुजुं वनाच्वंगु खँ धयादिल ।
थौं येँय् ग्वसाः ग्वःगु छगू ज्याझ्वलय् न्ववानादीसें उप-प्रधानमन्त्री गच्छेदारं स्वंगू दलं सहमतीय सरकार दयेके मफूसा स्वंगू दलया दायित्व नं फुइगु खँ धयादिल ।
वय्कलं स्वंगू दलतय्गु जिद्दिया कारणं देशय् संकट ब्वलनाच्वंगु खँ न्ह्यथनादिसें स्वंगू दलया स्वार्थया कारणं संविधान च्वयेगु व शान्ति प्रकृया निष्कर्षय् थ्यंके मफूगु नं द्वपं बियादिल । अथेहे ततःधंगु दलतय्सं सरकारया नेतृत्व यायेगु दायित्व तंके धुंकूगुलिं न्हूगु सरकारया नेतृत्व चिचीधंगु दलं याये दयेमाःगु दाबी नं यानादिल ।
वयकलं सरकारया नेतृत्व यायेत चिचीधंगु दलतय्के स्पष्ट एजेण्डा दुगु खँ धयादिल ।
