'विश्वासया लकस दयेकूसा माओवादीया नेतृत्व स्वीकार'
नेकपा (एमाले)या नायः झलनाथ खनालं गुगु पार्टीं शान्ति व संविधान दयेकेगु ज्या सुनिश्चित यायेगु खाका न्ह्यब्वइ उगु हे पार्टीया नेतृत्व स्वीकार यायेगु खँ धयादीगु दु ।
एमाले निकट बुद्धिजीवि संगठनं थौं येँय् ग्वसाः ग्वःगु ज्याझ्वःयात सम्बोधन यानादिसें नायः खनालं शान्ति व संविधान दयेकेगु विश्वास यायेफइ कथंया लकस दयेकूसा माओवादीया नेतृत्व नं स्वीकार यायेफइगु खँ धयादिल ।
नायः खनालं एमालेया कारणं सहमति दयेकेगु लकस ब्वलनाच्वंगु धयादिसें अझ नं छुं छुं देशी विदेशी शक्तित सहमतिया लकस स्यंकेत सक्रिय जुयाच्वंगु द्वपं नं बियादिल ।
थ्वहे झ्वलय् सूचना तथा संचार मन्त्री शंकर पोखरेलं शान्ति व संविधानयात प्रतिबद्ध जूसा माओवादीया नेतृत्व स्वीकार यायेफइगु बिचाः प्वंकादिल ।
संचार समीक्षा मंचया थौं येँय् उलेज्या यानादिसें संचार मन्त्री पोखरेलं थुकथं बिचाः प्वंकादिसें माओवादीं नेपाली कांग्रेस व एमालेयात विश्वासय् कयाः ज्या याःसा माओवादीया नेतृत्वय् सरकार दयेकेफइगु खँ धयादिल । संचारमन्त्री पोखरेलं सहमतिपाखें हे सरकार दयेकेमाःगु खँय् बः बियादिसें माओवादीयात सहमती वयेत नं इनाप यानादिल ।
ज्याझ्वलय् प्रेस काउन्सिल नेपालया नायः नारायण प्रसाद शर्मा, सूचना विभागया महानिर्देशक श्रीधर शर्मा, राष्ट्रिय सूचना आयोगया नायः विनय कसःजु, पत्रकारत देवप्रकाश त्रिपाठी, ध्रुवहरी अधिकारी लिसेंया वक्तातय्सं सहमतिपाखें हे न्हूगु सरकार दयेकेत इनाप यासें नेपाःया पत्रकारिताया विकासय् मंचं सकि्रय कथं ज्या यायेमाःगु खँ न्ह्यथन ।
