कार्यदलं प्रतिवेदन शीर्ष नेतातय्त लःल्हात
सेना समायोजनया ल्याः व मोडालिटी क्वःछिइत निस्वंगु कार्यदलयं थःगु प्रतिवेदन स्वंगू दलया शीर्ष नेतातय्त लःल्हाःगु दु ।
थौं च्वंगु कार्यदलय व शीर्ष नेतातय्गु मुँज्याय् कार्यदलं प्रतिवेदन लःल्हाःगु खः । प्रतिवेदनय् न्ह्यथनातःगु विषय बारे धा:सा नेतातय्सं सहमति जुइधुंकाः जक सार्वजनिक यायेगु धाःगु दु । शीर्ष नेतातय्सं प्रतिवेदन सकारात्मक जूगु व थुकीया बारे थप अध्ययन यायेगु धासें थौंया मुँज्या लिछ्याःगु खः ।
मुँज्याय् माओवादीं सरकार गठन व शान्ति प्रक्रियाया बारे नं छकलं सहलह जुइमाःगु बिचाः प्वंकूगु खः । अथेहे माओवादीं सरकार गठनय् सर्त मतेत नं मेगू दलतय्त इनाप याःगु खँ सीदुगु दु ।
दलत दथुइ सरकार निर्माण, सेना समायोजनया खाका व ल्या:या विषयस कचवं जुइवं उकीया बारे समान बिचाः दयेकेत छगू कार्यदल निस्वंगु खः । उगु कार्यदलं म्हिग न्हिछि सहलह यानाः प्रतिवेदन तयार याःगु खः । तर कार्यदलं प्रतिवेदनय् सहमति यायेमफेवं कार्यदलं शीर्ष नेतातय्त प्रतिवेदन पेश याःगु खः ।
