'सैनिक ऐन कथं लडाकू समायोजन'

एकीकृत नेकपा (माओवादी)या लडाकू समायोजन सैनिक ऐन २०६३ कथं जुइमाःगु खँ सेनां धाःगु दु ।

सैनिक मुख्यालय भद्रकाली थौं छगू पत्रकार सम्मेलन यानाः सेनां थःपिंसं राजनीतिक तहलय् जुइगु सहमति न्हापा निसें माने याना वयाच्वंगु व आः नं माने यायेगु धासें सैनिक ऐन लगायतया आधारय् जुइगु सेना समायोजन प्रक्रियाय् सेनाया असहमति मजुइगु धाःगु दु ।

पत्रकार सम्मेलनय् सैनिक प्रवक्त रमिन्द्र क्षेत्रीं माओवादी लडाकूयात विशेष समिति हयेगु ज्या सकारात्मक जूगु प्रतिक्रिया बियादिसें सेना समायोजन स्वयां पुनःस्थापना यायेगु खँय् बः बीमाःगु धयादिल ।

उखे माओवादीं धाःसा सैनिक ऐन अन्तर्गत लडाकु समायोजन यायेगु खँयात अस्वीकार यानावयाच्वंगु दु ।