प्रधानमन्त्रीया निर्वाचन माघ २० गते
सहमतिो प्रणाली पाखें देशय् न्हूम्ह प्रधानमन्त्री ल्ययेत दलत असफल जुइवं वइगु माघ २० गते प्रधानमन्त्रीया निंतिं चुनाव जुइगु जूगु दु ।
राष्ट्रपति पाखें सहमतिय सरकार गठनया निंतिं ब्यूगु ई म्हिग क्वचायेवं थौं हानं राष्ट्रपतिं बहुमतीय सरकार गठनया प्रक्रिया न्ह्याकेत व्यवस्थापिका संसदयात पौ छ्वःगु खः । राष्ट्रपतिया पौ लिपा थौं च्वंगु संसदया कार्यव्यवस्था समितिया मुँज्यां माघ २० गते बहुमतीय प्रणाली पाखें प्रधानमन्त्री ल्ययेगु तिथि क्वःछिउगु खः ।
अथेहे माघ २० गते प्रधानमन्त्री ल्ययेमफुसाः माघ २२ व २३ गते निगूगु व स्वंगूगु चरणया निर्वाचन यायेगु निर्णय नं समितिं याःगु खः । थ्वस्वयां न्ह्यः संविधानया नियमावली संशोधन यानाः दलतय्सं अप्वलय् स्वक्वः तक निर्वाचन यानाः प्रधानमन्त्री ल्ययेगु व्यवस्था पारित याःगु खः ।
थौं च्वंगु संसदया मुँज्याय् सभामुख सुभाषचन्द्र नेम्वाङं राष्ट्रपतिं संसदय् छ्वःगु पौ ब्वनाः न्यंकादिसें वइगु २० गते १ बजे प्रधानमन्त्रीया निर्वाचन जुइगु जानकारी बियादीगु खः । प्रधानमन्त्रीया निंतिं उम्मेदवारतय् मनोनयन दर्ता यायेगु तिथि धाःसा माघ १९ गतेया निंतिं क्वःछिनातःगु दु ।
