शनिवाः हानं स्वंगू दलया मुँज्या
सहमतिय सरकार गठन यायेगु ई क्वचायेधुंकाः नं सहमतिय सरकार गठन यायेगु धासें थौं च्वंगु मू स्वंगू दलया मुँज्या नं बिना निष्कर्ष क्वचाःगु दु ।
सरकार गठन नापं सेना समायोजनया खाकाया बारे सहलह यायेत च्वंगु मुँज्याय् सेना समायोजन बारे सहमति मजुइवं सरकर निर्माणय् नं लिच्वः लाःगु खः । येँया होटल र्याडिसनय् च्वंगु मुँज्याय् थौं सहमति मजूसां दलत सहमति उन्मुख जूगु खँ नेतातय्सं धाःगु दु ।
मुँज्या लिपा नेकपा (एमाले)या नायः झलनाथ खनालं दलत सहमति नापसं थ्यंगु धासें कंस शनिवाः सहमति जुइगु विश्वास प्वंकादिल ।
थौंया मुँज्याय् दलत दथुइ सेना समायोजनया खाका व सुरक्षा निकायलय् समायोजन जुइगु लडाकूतय् ल्याः बारे सहलह जूसां उकी सहमति जुइमफुगु खः । नेपाली कांग्रेस व एमालें सेना समायोजनया खाका व लडाकूया ल्याःया बारे सहमति जूसाः माओवादी नेतृत्वय् सरकार गठन यायेफइगु खँ धाःगु खः ।
देय् बहुमतिय प्रणालीलय् वंसाः राजनीतिक दलत सहमतिय सरकारया निंतिं धासें कुतःलय् व्यस्त जुयाच्वंगु दु । थ्वहे दथुइ शनिवाः हानं स्वंगू दलया मुँज्या च्वनीगु जूगु दु ।
