राज्य पुनर्संरचना बाहेक मेगू प्रतिवेदन संवैधानिक समितिलय्
संविधानसभा अन्तर्गतया राज्य पुनर्संरचना व राज्य शक्तिया बाँडफाँड समितिया प्रतिवेदन बाहेक ल्यँ दुगु फुक्कं समितिया प्रतिवेदन संवैधानिक समितिलय् छ्वःगु दु ।
थौं च्वंगु संविधानसभाया मुँज्यां प्रतिवेदनय् जूगु सहलह व सहमतिया आधारय् सुझाव व निर्देशन सहित प्रतिवेदनत संवैधानिक समितिलय् छ्वःगु खः । मुँज्यां छुं सभासदतय्सं नागरिकता व सांस्कृतिक नापं सामाजिक एक्यबद्धता निर्धारण सम्बन्धी व्यवस्थाया विरोध याःसां प्रस्ताव बहुमतं पारित जूगु घोषणा याःगु खः ।
संविधानसभां मौलिक अधिकार नापं निर्देशक सिद्धान्त निर्धारण समिति, व्यवस्थापकीय अंगया स्वरुप निर्धारण समिति, राज्यया शासकीय स्वरुप निर्धारण समिति, न्याय प्रणाली, राष्ट्रिय हित संरक्षण, संवैधानिक समिति व सांस्कृतिक व सामाजिक नापं एक्यबद्धताया अधार निर्धारण समितिया प्रतिवेदन छ्वःगु खः ।
राज्य पुनर्संरचना सम्बन्धी धाःसा राजनीतिक दलत दथुइ आयोग गठन यायेगु वा मयायेगु धइगु विषयस विवाद जुयाच्वंगुलिं उगु प्रतिवेदन मछ्वःगु खँ धाःगु दु । थ्वस्वयां न्ह्यः राज्य पुनर्संरचना समिति नेवाः प्रदेश सहितया झिंप्यंगू प्रदेश दुगु न्हूगु राज्य पुनर्संरचनाया खाका तयार याःगु खः ।
