सहमति मजुइवं आः बहुमतीय प्रणाली पाखे
राष्ट्रपति रामवरण यादवं सहमतिय सरकार गठनया निंतिं ब्यूगु ईया लिप्पांगु न्हि नं राजनीतिक दलत दथुइ सहमति मजुइवं आः प्रधानमन्त्री ल्ययेत बहुमतीय प्रक्रिया पाखे वनीगु जूगु दु ।
सहमतिय सरकार गठनया निंतिं थौं येँया गोकर्ण रिसोर्टय् च्वंगु मू स्वंगू दल एनेकपा (माओवादी), नेपाली कांग्रेस व नेकपा (एमाले)या मुँज्या बिना निष्कर्ष क्वचायेवं सहमतिय प्रणाली पाखें आः बहुमतीय प्रणालीलय् वनेत्यंगु खः ।
वंगु माघ १ गते राष्ट्रपति यादवं अन्तरिम संविधानया धारा ३८या (१) कथं सहमतिय सरकारया निंतिं न्हय्न्हुया ई बियादीगु खः । न्हय्न्हु दुने नं सहमतिय सरकार गठन मजुइवं राजनीतिक दलतय् इनापय् राष्ट्रपतिं हानं न्यान्हु थप याःगु खः ।
उगु न्यान्हुया दुने नं सहमतिय सरकार गठन मजुइवं कन्हय् सुथय् राष्ट्रपति यादवं संविधानया धारा ३८या (२) कथं बहुमतिय सरकारया निंतिं आव्हान यानादीगु जूगु दु ।
