स्वंगू दलया मुँज्या बिना निष्कर्ष क्वचाल
सहमतिय सरकार गठनया निंतिं च्वंगु प्रमुख स्वंगू राजनीतिक दलतय् मुँज्या बिना निष्कर्ष क्वचाःगु दु ।
राष्ट्रपति डा. रामवरण यादवं सहमतिय सरकार गठनया निंतिं ब्यूगु ईया थौं लिप्पांगु न्हि येँया गोकर्ण रिसार्टय् च्वंगु स्वंगू दलया मुँज्या दलतय् थःथःगु अडानया हुनिं निष्कर्ष बिहीन जूगु खः । स्वंगूलिं दलतय्सं थःगु अडान त्वःतेगु संकेट मक्येनवं रिसोर्टय् च्वना याःगु निगू पक्षीय व स्वंगू पक्षीय सहलह पाखें छुं लिच्वः पिहांमवगु खः ।
सरकार गठन लगायत सेना समायोजन, शक्तिया बाँडफाँट लगायतया विषयस नं थौंया मुँज्या सहलह जूगु खः । सेना समायोजन व शक्तिया बाँडफाँट नापं शान्ति व संविधानया विषयस माओवादीया प्रतिवद्धता वःसा कांग्रेसं सरकारया नेतृत्वया अडान त्वःतीगु सम्भावना दुगु खँ सीदुगु दु ।
मुँज्या लिपा कांग्रेस संसदीया दलया नेता रामचन्द्र पौडेलं शान्ति व संविधान सुनिश्चित जूसाः कांग्रेस न्ह्याःगु नं त्याग यायेत तयार दुगु प्रतिक्रिया बियादिल ।
सहमतिय सरकार गठन यायेगु लिप्पांगु न्हि नं दलत दथुइ सहमति मजूसां बहुमतीय प्रक्रियाया दथुइ हे सहमति मालेगु कुतः यायेगु खँ नेतातय्सं धाःगु दु । सहमति यायेगु धासें दलत हानं कन्हय् ११ बजे मुँज्या च्वनीगु जूगु दु ।
