'भिडियो नं माओवादीयात हे फाइदा'
माओवादीया अध्यक्ष व प्रधानमन्त्री पुष्पकमल दाहाल प्रचण्डं प्रतिक्रियावादी व सैनिक सर्वोच्चतावादी तत्वतय्सं सैनिक सर्वोच्चता कायम यायेगु ग्वसाः कथं जनतायात भ्रम ब्वलंकेगु ताः तयाः दत्याः न्ह्यःया भिडियो टेप सार्वजनिक याःगु द्वपं बियादीगु दु ।
थम्ह ब्यूगु भाषण लिपा बाग्मति खुशी यक्वः लः वाः वनेधुंकूगु धासें शान्ति प्रकृयायात तार्किक निष्कर्षय् थ्यंकेत व निर्धारित ईलय् संविधान सभायापाखें अग्रगामी न्हूगु संविधान निर्माण यायेत थःपिं प्रतिबद्ध जूगु धयादिल ।
म्हिग सार्वजनिक जूगु भिडियो टेपया बारे स्पष्ट यायेत याःगु पत्रकार सम्मेलनय् वयेकलं सार्वजनिक भिडियो टेपं माओपादीयात हे फाइदा याःगु धासें थुकीं दक्वं दलयात घाटा याःगु धयादिल । संविधानसभा मजुइगु व द्वन्द्वय् वनेगु अवस्थाय् कार्यकर्ता यात ब्यूगु भाषण सार्वजनिक यानाः जनताय् भ्रम ब्वलंकेगु कुत: याःगु द्वपं बियादिल ।
थ्वः भिडियो टेप दत्याः न्ह्यः संविधानसभाया निर्वाचन जुइमखुकी धइगु ईलय्या जूगु धासें माओवादीनाप सकस्यां थुगु सिवें पाःगु जनमुक्ति सेना दुगु दावी यानादिल । वयेकलं माओवादी नाप वः ईलय् स्वंगु तहया सेना दुगु खँ धयादिल । केन्द्रीय, क्षेत्रीय व जनमिलिसिया यानाः स्वंगु तहया माओवादी जनसेना दुगु न्ह्यथंसें वयेकलं भिडियोलय् केन्द्रीय सेनाया बारे जक न्ववानाःगु धयादिल । वयेकलं स्वंगुलिं तहया जनसेनाया ल्या न्यनेगु खसाः छगू लाख स्वयां अप्वः जनसेना दुगु दावी यानादिल ।
सिंहदरवाय् च्वंगु माओवादी संसदीय दलया ज्याकूथीइ याःगु पत्रकार सम्मेलनय् माओवादी अध्यक्ष दाहालं नागरिक सर्वोच्चताया निंतिं व राष्ट्रपितं द्वैध सत्ता संचालन यायेत स्वःगुलिं प्रधानमन्त्री पदं राजीनामा बियागु प्रष्ट यानादिल । वयेकलं देशयात निकाश बीत व कुर्सी टासे जुयाच्वनीगु पार्टी मखु धकाः पुष्टि यायेत थम्हं राजीनामा बियागु धयादिल ।
राष्ट्रपितं ल्ह्वंगु पलाः यात 'कु' हे जूगु धकाः पार्टीं ठहर याःगु धासें वयेकलं उकीया विरुद्ध सदन दुने व पिने विरोध यायेगु धयादिल । राष्ट्रपतिया असंवैधानिक पलाः भिंकूसाः सहमतिया कथं माओवादीया हे नेतृत्वय् सरकार गठन जुइफइगु धयादिल । वयेकलं राष्ट्रपतिं असंवैधानिक पलाः भिंकाः नागरिक सर्वोच्चता कायम जुसाः सरकार देयेकेत माओवादीं ग्वहालि याइगु धयादिल ।
माओवादीं ल्ह्वंगु संविधानसभा व लोकतान्त्रीक गणतन्त्रया खँ नं दलतय्सं लिपा जक थुइकूगु धासें सैनिक सरकारया मातहतय् जुइमाः धइगु नं दलतय्सं लिपाः थुइकीगु दाबी यानादिल ।
स्वदेशी व विदशी पत्राकारतय्सं जाःगु हलय् अध्यक्ष दाहलं पत्राकारतय्गु न्ह्यसःया दृढता पूर्वक लिसः बियादीगु खः । छम्ह भारतीय पत्रकारं सेना अवकास विवादय् भारतया ल्हा दुगु धइगु बुखँया बारे विस्तृत रुपं थुइकेत इनाप याःगु लिसलय् वयेकलं थम्हं विदेशी शक्तिया ल्हा दुगु जक धयागु तर भारतया नां मकायाःगु स्पष्ट यानादिल । तर विदेशी शक्ति सु व गु कथंया हस्तक्षेप जूगु धासाः धयामदी ।
