द्वछि धरौटी रेग्मी रिहा, खनालपाखें माफी
नेकपा (एमाले)या नायः झलनाथ खनालयात न्यतालय् दाःम्ह देवीप्रसाद रेग्मीयात द्वछि धरौटी व लच्छिया तारेखय् जिल्ला प्रशासन ज्याकू सुनसरीं त्वःतुगु दु । सुनसरी भरौलया रेग्मी विरुद्ध सार्वजनिक अपराधय् मुद्दा दायर जुइवं झिन्यान्हु कुनेत आदेश ब्यूगु खःसां रेग्मीं गल्ति प्रति क्षमा फ्वनेवं समान्य धरौटीलय् हे त्वःगु खः ।
थौं छगू विज्ञप्ति पिथना रेग्मीं खनाल थंज्याःम्ह राष्ट्रिय व्यक्तित्वयात सार्वजनिक थासय् न्यतालय् दाःया थःम्हं अपराध यानाःगु धासें क्षमा फ्वंगु दु । रेग्मीं थः आवेशय् वयाः सुझबुझ तंकाः थःम्हं अपराध यानाःगुलिं थः दुःखी जुयाःगु खँ विज्ञप्ति न्ह्यथनातःगु दु ।
उखे रेग्मीयात त्वःतुगु छुं ई लिपा हे एमाले नायः खनालं छगू विज्ञप्ति पिथना थःयात दुर्व्यवहार याःम्ह रेग्मीयात क्षमा बियागु धयादीगु दु । वय्कलं विज्ञप्तिइ रेग्मीयात माफी बीत प्रहरी प्रशासनयात नं इनाप यानादीगु दु ।
वंगु माघ ६ गते पार्टीं इटहरीलय् ग्वसाःग्वःगु छगू सार्वजनीक ज्याझ्वलय् रेग्मीं मञ्चय् वयाः खनालयात न्यतालय् दाःगु खः ।
