रौतहटय् अनिश्चितकालीन बन्द, हटौंडाय् बन्द लितकाल
एकीकृत नेकपा (माओवादीं) थः कार्यकर्ता हत्याया विरोधय् थनिंनिसें अनिश्चितकालीन रौटहत बन्दया आव्हान याःगु दु । माओवादी भोजपुरा राज्य समितिया ४०दँ दुम्ह दुजः रुक्साना खातुनया हत्या जूगु विरोधय् माओवादी अनिश्चितकालीन बन्दया आव्हान याःगु खः ।
बन्दया हुनिं रौटहतया जनजीवन प्रभावित जूगु दु । माओवादीं बन्दया झ्वलय् एम्बुलेन्स, संचारकर्मी, कुटनीतिक नियोग, पर्यटक नापं अत्यावश्यक यातायातया सवारी साधानयात धाःसा अवरोध मयायेगु धाःगु दु ।
माओवादीं हत्याय् संलग्न जूम्हेसित कारवाही यायेमाःगु व सीम्ह खानुतायात शहिद घोषणा यायेमाःगु माग याःगु दु । खातुनायात म्हिग स्वम्ह अज्ञात बन्दुधारीतय्सं गोलीं क्येकाः स्याःगु खः । घटनाया जिम्मा भुमिगत संगठन जनतान्त्रिक तराई मधेश मुक्ति पार्टीं काःगु दु ।
उखे मकवानपुरयात लोडसेडिङ मुक्त जिल्ला घोषणा यायेमाःगु माग राप्रपा (नेपाल) निकट राष्ट्रिय प्रजातान्त्रिक युवक संगठनं थौं याःगु मकवानपुर बन्द न्हिनय् लितकाःगु दु । युवक संगठनं हेटौंडाया बुद्धचोकय् छगू कोणसभा यानाः बन्द लितकाःगु खः ।
वस्वयां न्ह्यः बन्दया अवज्ञा याःगु धासें युवक संघया कार्यकर्तातय्सं खुगः गाडी तोडफोड याःगु खः । प्रर्दशनकारीतय्सं ना. ३. ख. ४८६६, ना. ३. ख. ४४४१, ना. ३. ख. २१४३ व ना. ४. ख. २३८८ नम्बरया प्यंग ट्रक, ना. ३. ख. ७३९३ नम्बरया बस व ना. १३. प. ५०२५ नम्बरया मोटरसाइकल तोडफोड याःगु खः । बन्दया इलय् लँ पनाः बन्द याकेत स्वःपिं झिंन्याम्ह प्रदर्शनकारीतय्त प्रहरीं ज्वंगु खः ।
