अनमिनया ज्या छु खः प्रधानमन्त्रीं मसिउ

येँ (सन्ध्या टाइम्स)/देय्या थीथी शिविरय् च्वनाच्वंपिं माओवादी लडाकुतय्त निगरानी यानाच्वंगु राष्ट्र संघीय निकाय अनमिन ला लिहां वन, तर अनमिनं नेपालय् लडाकुया सवालय् वास्तवय् छु छु ज्या याइगु खः धइगु खँ धाःसा प्रधानमन्त्रीं तकं मसिउगु जुयाच्वन। अय् जुयाः प्रधानमन्त्री माधव नेपालं अनमिन लिहां वनीगु जुल धायेवं हे आः माओवादीया लडाकु व उमिगु ल्वाभः समेत विशेष समितियात लः ल्हा धकाः अनमिन प्रमुखयात पौ च्वयाछ्वःगु लानाच्वन। प्रम नेपालं अज्याःगु पौ च्वयाः छ्वया हःगु खनाः अनमिन पदाधिकारीतय्सं वय्कःया अनभिज्ञतायात हास्यास्पद रुपं काःगु खँ सीदुगु दु ।

सूत्रया कथं नेपालय् अनमिन दु धइगुया अर्थ उमिसं माओवादी लडाकु व उमिगु ल्वाभः समेत थःपिनि नियन्त्रणय् तयातःगु दु धकाः प्रम नेपालं थुइकूगु जुयाच्वन। तर यथार्थ धाःसा अथे मखु। माओवादी लडाकुत क्यान्टोनमेन्टय् च्वनीगु खःसां उपिं माओवादी कमाण्डर पासाङया कमाण्डय् च्वनीगु खःसा कन्टेनरय् तयातःगु ल्वाभःया ताःचा नं उमिके हे दइगु खः। अनमिनं केवल सीसीटीभी तयाः कन्टेनरय् च्वंगु ल्वाभः सुनां थिउ वन ला धकाः निगरानी जक तइगु खः। छुं जुयाः माओवादी लडाकुं ल्वाभः लिकाः हे वंसां नं अनमिनं पने फइ मखु। वं ला केवल उकिया जानकारी जक नेपाःया सरकार व राष्ट्र संघयात बीगु खः। तर प्रम नेपालं अज्याःगु खँ हे मथुइकुसे 'माओवादीया ल्वाभः नं लःल्हा' धकाः पौ च्वयाछ्वःगु खनाः अनमिनया विदेशी पदाधिकारीत न्हिलाच्वंगु खँ सूत्रं धाःगु दु। प्रधानमन्त्रीं अज्याःगु पौ च्वःगु खनेवं माओवादी अध्यक्ष प्रचण्डं तुरुन्त हे प्रधानमन्त्री नापलानाः अनमिनं माओवादीया ल्वाभः लित बी फइ मखु धकाः ध्वाथुइकादीगु खः ।

प्रधानमन्त्रीपाखें अज्याःगु पौ वंगुलिं वय्कलं अनमिनया कार्यविधि तक हे मसिउगु खँ स्पष्ट जूगु दावी सूत्रं याःगु दु। अनमिनं नेपालय् छु छु ज्या यानाच्वंगु दु व शान्ति सम्झौताय् वयात छु छु जिम्मा बियातःगु दु धइगु खँ हे प्रधानमन्त्रीं मसिउगु खँया दसि वय्कःया उगु पौ खः धाःगु दु ।