'माओवादीयात अझ हे सरकार बी मत्यःनि'
येँ (सन्ध्या टाइम्स)/माओवादी लडाकुयात विशेष समिति अन्तर्गत तये हयेवं आः थःपिनि नेतृत्वय् हे सरकार गठन यायेगु सम्भावना नं अप्वल धकाः कार्यकर्ता दथुइ प्रचार याः जुयाच्वंम्ह माओवादी अध्यक्ष प्रचण्डयात एमाले व कांग्रेसया छुं अनुदारवादी नेतातय्सं 'ब्रेक' तयेगु ज्या याना बिउगु दु ।
माओवादी अध्यक्ष प्रचण्डं म्हिगः सुथय् हेटौंडाय् आः सरकार गठनया जिम्मा थःपिंत वइ धकाः न्ववाःगुयां ६ घण्टा लिपा हे येँय् जूगु मेगु कार्यक्रमय् एमालेया अनुदारवादी नेता शंकर पोखरेल व कांग्रेसया मेम्ह अनुदारवादी नेता डा. रामशरण महतं लडाकुयात पूर्ण रुपं पुनर्स्थापना मयाःतले माओवादीया नेतृत्वय् सरकार गठन याये मजिउनि धकाः बिचाः बिउगु दु ।
थ्व निम्हं नेतातय्सं लडाकु विशेष समिति मातहत तये हःसां व्यवस्थापनया ज्या अझ नं क्वमचाःगु कारणं माओवादीयात सरकार गठन याके बीगु ई मत्यःनि धयाहःगु खः। उमिगु धापू कथं लडाकु विशेष समिति अन्तर्गत वःगु इलय् लाक्क उगु समितिया अध्यक्ष समेत जुइम्ह प्रधानमन्त्री पद माओवादीयात तुं बिल धाःसा लडाकुया अहम् अप्वयेफुगु जूगुलिं माओवादीया नेतृत्वय् सरकार गठन याये मजिउनि ।
अध्यक्ष प्रचण्डं धाःसा सहमतीय सरकार गठनया लागिं राष्ट्रपतिं थपे याःगु न्यान्हुया दुने हे थःपिनि सरकार वइ धकाः दावी यानादीगु खः ।
