मधेसवादी दलत राष्ट्रिय सरकारया पक्षय्
प्रमुख मधेसवादी दलत राष्ट्रिय सहमतिया सरकारया पक्षय् दृढतापूर्वक दनेगु निर्णय याःगु दु ।
प्रधानमन्त्रीया राजीनामा लिपाः उत्पन्न संकटया समाधानय् मंकाः अवधारणा दयेकेत मंकाः सहलह यापिं मधेसवादी दलतय् मंकाः बैठकं मेधीसी लोकतान्त्रिक मोर्चायात सकृय यायेगु निर्णय याःगु दु ।
मोर्चाय् मधेसी जनअधिकार फोरम, तराई मधेस लोकतान्त्रिक पार्टी व सद्भावना पार्टी दुथ्याः । बैठकय् ब्वति काम्ह तमलोपाया नेता हृदेश त्रिपाठीं मंकाः लोकतान्त्रिक मधेसी मोर्चा व सरकार दथुइ २०६४ फागुन १६गते जूगु च्यागू बुदेँ सम्झौतायात प्रभावकारी कार्यान्वयन यायेत मोर्चाया कृयाशिल यायेगु सहमति जूगु जानकारी बियादिल ।
सिंहदरवारय् च्वंगु तमलोपा संसदीय दलया ज्याकूलय् जूगु सहलहलय् फोरमया सहअध्यक्ष जेपी गुप्ता, वरिष्ठ नेता विजय गच्छेदार, सद्भावनाया अध्यक्ष राजेन्द्र महतो लगायत नेतातय्सं ब्वति काःगु खः ।
फोरमया सहअध्यक्ष गुप्तां बैठकय् राष्ट्रिय सहमतिया सरकार देयेकेत दृढतापूवएक न्ह्यायेगु सहमति जूगु जानकारी बियादिल ।
