निःशुल्क क्लिनिकया बुन्हि
येँ (सन्ध्या टाइम्स)/श्री केशचन्द्र पारावर्त महाविहार संरक्षण समाजया ग्वसालय् इतुंबहाः निःशुल्क क्लिनिकया खुदँ बुन्हि हंगु दु। इतुंबहाः दुने हे जूगु उगु ज्याझ्वलय् मूपाहां हेमपूर्णानन्द बज्राचार्यं (चत्रेश्वर बाहाःया थाय्पा) ज्याझ्वःया उलेज्या यानादीगु खः ।
ज्याझ्वलय् विशेष योगदान यानादीपिं डा. तृप्ती शाक्य, डा. सुरिक्षा बज्राचार्य व बाहाःया संरक्षणया निंतिं विशेष योगदान यानादीम्ह ज्ञानकाजी शाक्ययात हंगु खः। अथे हे क्लिनिकय् स्वयंसेवककथं सेवा यानाच्वनादीपिं सकलें डाक्टर, नर्स व स्वयम् सेवकपिंत नं लुमंतिचिं लःल्हाःगु खः। सुरेशमान शाक्यं वार्षिक प्रतिवेदन न्ह्यब्वःगु खः।
डा. योगेन्द्रमान शाक्यं थुगु क्लिनिकयात सकसिनं सदुपयोग यायेमाः धासें हिदान यायेत विहारया सिफारिस कयाः जक यात धाःसा लिपा थःत आपालं सुविधा दइ धयादिल। वय्कलं हिदान नामं मिखा दान नं यायेगु याःसा अझ बांलाइ धयादिल ।
शनिवाः जक चायेकीगु उगु क्लिनिकय् आः न्हय्म्ह डाक्टर, निम्ह नर्स व निम्ह स्वयंसेविकापिं सेवारत जुयाच्वनादीगु दु। क्लिनिकया संयोजक उत्तम शाक्यया सभापतित्वय् जूगु उगु ज्याझ्वलय् केशवमान शाक्यं लसकुस यानादीगु खः। ज्याझ्वः याये न्ह्यः क्वाःपाः द्यःयाथाय् बुद्ध पुजा याःगु खः ।
