सहमतिया सरकार एमालेया न्हापांगु शर्त
नेकपा (एमालें) सहमतिया सरकार निस्वनेत फुक्क विकल्प खुल्ला तसें आपालं लचकता छ्यलेगु निर्णय याःगु दु ।
पार्टी मू ज्याकू बल्खुइ सोमवाः च्वंगु स्थायी समिति मुँज्यां नेतृत्वया नितिं फुक्क विकल्प खुल्ला तसें सहमतिया सरकार दयेकेमाःगुलिइ बः ब्यूगु खः । थःगु पार्टीया नेतृत्वया नितिं सहमतिया आपालं कुतः यायेगु व अथे मजूसा विकल्प नं खुल्ला तयेगु निर्णय मुँज्याय् जूगु एमाले मू छ्याञ्जे ईश्वर पोख्रेलं जानकारी बियादिल ।
एमाले संस्थापन पक्ष बहुमतया हे जूसां नं नेतृत्व एमालें कायेमाःगु अडानय् दुसा प्रधानमन्त्री माधवकुमा नेपाल व नेता केपी शर्मा ओली पक्ष कांग्रेस नेतृत्वय् सरकार दयेकेमाःगु पक्षय् अडान काःगु खः ।
मुँज्यां माओवादी जनसेना विशेष समिति मातहत वःगुलिइ लसकुस नं याःगु मू छ्याञ्जे पोखरेलं जानकारी बियादिल । अथेहे मुँज्यां पार्टी नायः झलनाथ खनालयात इटहरीइ ल्हाःवागु घटनाप्रति दुःख प्वंकूसें दोषीयात कारबाही यायेत माग यायेगु निर्णय नं याःगु दु ।
