नियमावली संशोधन प्रस्ताव संसदय् न्ह्यब्वल
व्यवस्थापिका संसदया कार्यसञ्चालन नियमावली संशोधन प्रस्तावय् दलत दथुइ सहमति जूगु दु ।
सहमति कथं प्रधानमन्त्री निर्वाचनय् छम्ह जक उम्मेदवार जूसा विश्वासया मत कायेमाःगु व निम्ह उम्मेदवार जूसा पक्षय् मत तयेमाःगु व्यवस्था याःगु दु । थुकथं हे स्वम्ह वा स्वम्ह स्वयाः अप्वः उम्मेदवार जूसा निक्वःतक्क फुक्कसिनं ब्वति कायेदयेमाःगु व उगु इलय् अप्वः मत हःपिं निम्हसिया दथुइ हानं धेंधेंबल्लाः जुइ । स्वंगूगु चरणय् नं बहुमत महःसा वा सु नं उम्मेदवार निर्वाचित जुइमफुसा निर्वाचन प्रक्रिया स्वतः खारेज जुयाः न्हूगु प्रक्रिया न्ह्याइ ।
दलतय् सहमति जुइवं एकीकृत नेकपा (माओवादी)या सभासद् एकराज भण्डारीं नियमावली संशोधन प्रस्ताव व्यवस्थापिका संसदया सोमवाःया मुँज्याय् न्ह्यब्वःगु दु । मंगलवाः न्हिनय् स्वताः ईया सःतुगु संसदया मुँज्याय् थुकीया बारे सहलह याइगु ज्याझ्वः दु ।
