ल्याः क्वःछिउसा समायोजन व पुनःस्थापनाय् समस्या जुइ : अनन्त
एकीकृत नेकपा (माओवादी)या स्थायी समिति दुजः वर्षमान पुन 'अनन्तं' सेना समायोजन व पुनःस्थापन जुइगु जनसेनाया ल्याः क्वःछी मज्यूगु खँ धयादीगु दु ।
रिपोर्टर्स क्लबं सोमवाः येँय् ग्वसाः ग्वःगु साक्षात्कार ज्याझ्वलय् नेता अनन्तं स्वेच्छिकरुपं पिहांवनीगु, पुनःस्थापना वा समायोजन प्रक्रियाय् घटबढ जुइगु जूगुलिं ल्याः क्वःछी मज्यूगु बिचाः तयादिल । माओवादी शान्ति प्रक्रियायात निश्कर्षय् थ्यंकेगु व संविधान निर्माण यायेगु विषयलय् तसकं लचक दुगु धयादिसें वय्कलं ल्याःया विवाद पिकयाः समायोजन प्रक्रियायात अवरुद्ध याये मज्यूगु धयादिल अनन्तं दलतय्गु थःथवय्या सहलहपाखें थुकियात क्वःछिफूगु नं धयादिल ।
जनसेना विशेष समिति मातहतय् वःसां नं उमिगु पार्टी दुजः कायम हे दुगु वय्कलं स्पष्ट यानादिल । पार्टीया छु नं ज्याझ्वलय् उमिगु ब्वति दइ वा दइमखु धइगु विषयलय् विशेष समितिइ सहलह यानाः जक क्वःछीगु जानकारी नं वय्कलं बियादिल ।
जनमुक्ति सेनायात विशेष समिति मातहत हयेगु निर्णय स्थायी समितिं हे याःगु जानकारी बियादिसें वय्कलं पार्टी दुने थुगु विषयलय् विवाद मदुगु स्पष्ट यानादिल । अथेहे वय्कलं सहमतिय सरकार दयेकेगु आधार तयार जुयाः वनाच्वंगु धयादिसें याकनं हे माओवादी नेतृत्वय् सरकार तयार जुइगु दाबी नापं यानादिल ।
