मू स्वंगू दल दथुइ पर्याप्त सहलहया कमी
मू स्वंगू दलं राष्ट्रिय सहमतिया सरकार निस्वनेगुलिइ पर्याप्त सहलह मगाःगु निष्कर्ष पिकाःगु दु ।
लाजिम्पाटस्थित होटल र्याडिसनय् सोमवाः च्वंगु एकीकृत नेकपा (माओवादी), नेपाली कांग्रेस व नेकपा (एमाले)या शीर्ष नेतातय्गु मुँज्यां सहमतिइ थ्यंकेत थप सहलह माःगु निष्कर्ष पिकाःगु खः । मंगलवाः न्हिच्छि निगू पक्षीय सहलह यायेगु व बुधवाः स्वंगू दलया मुँज्या च्वनीगु जानकारी माओवादी न्वकु नारायणकाजी श्रेष्ठ 'प्रकाशं' बियादिल । मुँज्याय् सरकारया नेतृत्व चक्रिय प्रणालीइ यायेगु विषयसं सहलह जूसां नं छु नं निर्णय मजूगु जानकारी प्रकाशं बियादिल ।
माओवादीं थः सेना व ल्वाभः विशेष समिति मातहत वःगु व संविधानसभाया दकले तःधंगु दलया हैसियतं सरकारया नेतृत्व थःपिंत दयेमाःगु अडान मुँज्याय् तःगु खः । कांग्रेसं धाःसा समायोजन जुइगु जनसेनाया ल्याः क्वःछि माःगु, द्वन्द्वकालय् कब्जा सम्पत्ती लित बिइमाःगु लगायतया सर्त तयाः आःया अवस्थाय् सरकारया नेतृत्व थःत दयेमाःगु अडान तःगु दु ।
नेकपा (एमालें) नं सहमतीय सरकार निस्वनेगुइ बः ब्यूसें थःगु दाबी त्वःतूगु मदुनि । न्ह्यन्हुया इलय् सहमति यायेमफयेवं राष्ट्रपतिं ब्यूगु थप न्यान्हुया ई बुधवाः क्वचायेत्यंगु दु । बुधवाः नं सहमतिइ सरकार निस्वने मफुसा बहुमतीय प्रक्रिया न्ह्याइ ।
