आः माओवादी नेतृत्वय् सहमतिय सरकार : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' शिविरया लडाकूत विशेष समितिया मातहतय् वयेधुंकूगुलिं आः माओवादीया नेतृत्वय् सहमतिया राष्ट्रिय सरकार गठन जुइगु दावी यानादीगु दु ।
क्रान्तिकारी पत्रकार संघ मकवानपुरं थौं हेटौंटाय् याःगु पत्रकार नापलाय् ज्याय् नायः प्रचण्डं शान्ति प्रक्रिया व संविधान निर्माणयात सकारात्मक मोडय् थ्यंकेत माओवादी प्रतिवद्ध जूगु धासें आः थुकी सुनां शंका मयासां ज्यूगु धयादिल ।
वय्कलं संविधानसभाय् दकलय् तःधंगु दल माओवादी जूगु व परिवर्तनया एजेण्डा नं माओवादीं हे ल्ह्वंगुलिं आः माओवादीया हे नेतृत्वया सरकार गठन जुइगु दावी यानादिल । वय्कलं माओवादी दुने प्रधानमन्त्रीया सम्बन्धी विवाद मदुगु धासें थःगु हे नेतृत्वय् न्हूगु सरकार गठन यायेगु आश्य प्वंकादिल ।
लडाकूत आः विशेष समितिया मातहत वयेधुंकूगुलिं लडाकूतय् पार्टी नाप छुं नं कथंया स्वापु मदइगु वय्कलं धयादिल । अथेहे वय्कलं पार्टी दुनेया विवादयात वैचारिक सहलहया संज्ञा बियादिसें उगु विवादयात वैचारिक ढंगं हे व्यवस्थापन यायेगु धयादिल ।
