आः माओवादी नेतृत्वय् सरकार: प्रचण्ड
येँ (सन्ध्या टाइम्स)/एनेकपा (माओवादी) दुने अध्यक्ष प्रचण्डं थःपिनि लडाकु विशेष समिति अन्तर्गत वनेधुंकाः आः माओवादीया हे नेतृत्वय् सरकार गठन जुइगु सम्भावना अप्वयावंगु खँ धयादीगु दु। वय्कलं धयादिल, 'आः माओवादीया नेतृत्वय् राष्ट्रिय सहमतिया सरकार गठन जुइगु सम्भावना तीव्र रुपं अप्वयावंगु दु ।'
थौं हेटौंडाय् क्रान्तिकारी पत्रकार संघपाखें याःगु छगू ज्याझ्वलय् न्ववासें अध्यक्ष प्रचण्डं थ्व खँ धयादीगु खः। शनिवाः थःपिनि लडाकुत फुक्कं प्रधानमन्त्री हे संयोजक जुयाच्वंगु विशेष समिति अन्तर्गत तये हयागुलिं आः थःपिनि नेतृत्वय् सरकार गठन जुइगु सम्भावना अप्वया वंगु खँ वय्कलं कनादीगु खः ।
माओवादीयात शान्ति प्रक्रियाया विरोधी खः धकाः द्वपं बियाच्वंपिं मनूतय्त लिसः बी कथं थःपिंसं लडाकु विशेष समिति अन्तर्गत तयागु खँ कनादिसें वय्कलं शान्ति प्रक्रिया व संविधान निर्माणया ज्या माओवादीया नेतृत्वय् न्ह्यानाच्वंगु कारणं आः सरकारया नेतृत्व नं माओवादीं यायेमाःगु खँ वय्कलं कनादिल ।
वय्कलं मुख्य दलतलिसे जूगु सहमति कथं आः माओवादीया हे नेतृत्वय् सरकार गठन जुइगु सम्भावना दुगु व राष्ट्रपतिपाखें सहमतिया सरकार गठन यायेगु लागिं हानं थपे याना बिउगु न्यान्हुया म्याद दुने हे थ्व सरकार गठनया सम्भावना दुगु खँ नं कनादिल। वय्कलं माओवादी नेतृत्वय् सरकार गठन जुल धाःसा जेठ १४ गते हे संविधान वइगु दावी नं यानादिल ।
