'माओवादीयात अझ विश्वास यायेगु ई मवनी'
एकीकृत नेकपा (माओवादी)या लडाकू सरकारया नियन्त्रणय् दुगु सेना समायोजन विशेष समितिया मातहत वःगु छन्हु लिपा नेपाली कांग्रेस व नेकपा (एमाले)या नेतातय्सं माओवादीयात अझ विश्वस यायेगु ई मवनीगु तर्क तःगु दु ।
येँय् थौं जूगु छगू ज्याझ्वलय् कांग्रेस नेता डा. रामशरण महतं माओवादीयात आः हे विश्वास यायेगु वातावरण तयार मजूनीगु धयादिल । नेता महतं माओवादीं सरकारया नेतृत्व यायेत व्यवहारिक रुपं हे लडाकू समायोजनया ज्या क्वचाये माःगु धयादिल ।
अथेहे ज्याझ्वलय् एमाले नेता नापं सूचना मन्त्री शंकर पोखरेलं शान्ति प्रक्रिया लिच्वलय् मथ्यंकं माओवादीयात सरकारया नेतृत्व बीमज्यूगु बिचाः प्वंकादिल । वय्कलं माओवादी संविधानसभाया तःधंगु दल जूसां शान्ति सम्झौताया ईलय् विद्रोही पक्ष जूगुलिं माओवादीयात आः हे विश्वास यानाः सरकारया नेतृत्व बीमज्यूगु धयादिल ।
