राष्ट्रिय सरकार दयेकेमाः : नेपाः राष्ट्रिय पार्टी
प्रधानसेनापति रुक्मांगद कटवालयात चीकेगु ज्यायात माओवादीया ज्यादति धइगु द्वपं बिसें आलोचना याःगु नेपाः राष्ट्रिय पार्टीं आः गठन जुइगु सरकार धाःसा माओवादी सहितया राष्ट्रिय सरकार जुइमाः धकाः माग याःगु दु । न्हूगु सरकार गठनयात कयाः म्हिगः च्वंगु सर्वदलीय बैठकय् न्ववासें उगु पार्टीया महासचिव विजय सैंजुं थ्व बिचाः न्ह्यब्वयादीगु खः । यदि राष्ट्रिय सहमतिया सरकार गठन जुल धाःसा उकियात थःगु पार्टीया नं समर्थन दइगु खँ वय्कलं कनादिल ।
तर आः न्ह्याम्हेस्यां हे सरकार गठन याःसां नं देशय् जनजातितय्सं ल्ह्वनाच्वंगु सम्पूर्ण माग पूवंके माःगु व राज्यं जनजाति विरोधी छुं नं ज्याखँ याये मजिउ धइगु थःपिनि शर्त दुगु खँ नं वय्कलं धयादिल ।
देशय् जल जमिन व जंगलया अधिकारया माग जुयाच्वंगु इलय् नकतिनि हे सरकारं नेवाःतय् अस्तित्व खतराय् लाइगु स्वनिगःया शहरी विकास सम्बन्धी विधेयक हयेगु तयारी यानाच्वन नेवाः आदिवासीयाके मन्यँसे थज्याःगु ज्या याये हे मजिउ । यदि थ्व विधेयक लित यंकेगु खःसा अज्याःगु सरकारयात नं थःपिंसं समर्थन याये फइगु खँ वय्कलं कनादिल ।
थ्व स्वयां न्ह्यः नेपाः राष्ट्रिय पार्टीं प्रधानसेनापति चीकेगु लागिं माओवादी नेतृत्वया सरकारं याःगु ज्याखँया विरोध याःगु खः । तर उकिया विरोध याःसां माओवादी सरकारयात न्हापा बियातःगु थःपिनि समर्थन लित कयागु घोषणा धाःसा मयाःनि ।
सर्वदलीय बैठकय् सभासद् बुद्ध साय्मि व न्वकु नरेशवीर शाक्यं नं ब्वति कयादीगु खः ।
