लडाकूत औपचारिक रुपं विशेष समिति मातहत
शान्ति प्रक्रियाया छगू महत्वपूर्ण ज्या कथं थौं एकीकृत नेकपा (माओवादी)या लडाकूत सेना समायोजन विशेष समिति मातहत वःगु दु ।
सरकार व माओवादीं मंकाः कथं चितवन स्थित स्वंगूगु डिभिजन शत्तिखोरय् छगू ज्याझ्वः यानाः लडाकूतय्त विशेष समिति मातहत वःगु घोषणा याःगु खः । ज्याझ्वलय् प्रधनमन्त्री माधवकुमार नेपालं लडाकू शिविरय् नेपाःया राष्ट्रिय ध्वाँय् ब्वयेकाः मन्त्रिपरिषद मार्फत दुगु विशेष समिति मातहत लडाकूत वःगु घोषणा याःगु खः ।
ज्याझ्वलय् प्रधानमन्त्री नेपाल व माओवादी नायः पुष्पकमल दाहाल 'प्रचण्डं' लडाकूत विशेष समिति मातहत वःगु सहमतिपौलय् ल्हाःचिं तयेगु नापं मंकाः रुपं बेलुन ब्वयेकादीगु खः । ज्याझ्वलय् न्ववासें प्रधानमन्त्री नेपाल व माओवादी नायः प्रचण्डं थुगु ज्यां शान्ति प्रक्रियायात न्हूगु मोडय् थ्यंकूगु धासें आः यकनं हे शान्ति प्रक्रिया क्वचाइगु विश्वास प्वंकूगु खः ।
माओवादीया सैन्य इन्चार्ज नं जुयादीम्ह वर्षमान पुन 'अनन्तं' न्ह्याकादीगु ज्याझ्वलय् लडाकूतय्सं थीथी सांस्कृतिक ज्याझ्वः न्ह्यब्वःगु खः । ज्याझ्वलय् प्रधानमन्त्री नेपाल, माओवादी नायः प्रचण्ड,सभामुख सुभाषचन्द्र नेम्वाङ, नेपाली कांग्रसया सभापति सुशील कोइराला, नेकपा (एमाले)या नायः झलनाथ खनाल, थीथी राजनीतिक दलया शीर्ष नेतात, प्रधान सेनापति छत्रमानसिंह गुरुङलिसे प्यंगुलिं सुरक्षा निकायया प्रमुख, कुटनीतिक नियोगया प्रतिनिधि लगायतया ब्वति दुगु खः ।
ज्याझ्वःयात तःजिक क्वचायेकेत लडाकू शिविर लगायतया थाय् श्रृंगार यानातःगु खः । ज्याझ्वःया इलय् मञ्चया नापसं लडाकूतय्सं सुरक्षा ब्यूगु खःसा मेगू थासय् सेना, सशस्त्र प्रहरी व जनपथ प्रहरीया पुचः परिचालन यानातःगु खः ।
लडाकूतय् स्वापु औपचारिक रुपं माओवादी नाप स्वापु त्वःदलेवं लडाकूतय्सं थःपिं शान्ति व न्हूगु संविधानया पक्षय् दुगु प्रतिक्रिया ब्यूगु दु ।
