आइतवाः तकया दुने राष्ट्रिय सरकार गठन यायेत आह्वान
राष्ट्रपति डा. रामवरण यादवं थ्वहे वइगु आइतवाः तकया दुने राष्ट्रिय सरकार गठनया निंतिं पहल या धकाः संविधानसभाय् दुथ्याःगु राजनीतिक पार्टीतय्त आह्वान यानादीगु दु । देशय् लागू जुयाच्वंगु अन्तरिम संविधानय् बहुमतीय प्रणाली सिबें नं सहमतीय प्रणालीयात महत्व बियातःगु व न्हापां सहमतीय सरकार हे गठन यायेमाः धयातःगु कारणं राष्ट्रपति यादवं बहुमतीय सरकार गठनया निंतिं राजनीतिक पार्टीतय्त इनाप यानादीगु खः ।
तर राष्ट्रिय सरकार गठन यायेगु लागिं दकलय् तःधंगु पार्टी नेकपा माओवादी या साथ धाःसा मदयेकुसें मगाः । माओवादी समेत जाल धाःसा तिनि राष्ट्रिय सरकार गठन याये फइ । तर माओवादीं राष्ट्रपति डा. रामवरण यादवं ल्ह्वंगु गलत पलाःयात संशोधन मयाःतले थःपिं सरकारय् वने मखु धाये धुंकूगु कारणं राष्ट्रिय सरकार गठनया सम्भावना तसकं म्हो जक दु ।
छुं जुयाः राष्ट्रिय सरकार दयेके मफुत धाःसा संविधानया प्रावधान कथं बहुमतीय सरकार गठन याः वने माली । बहुमतीय सरकार दयेकेगु लागिं कांग्रेसं एमालेयात प्रस्ताव तयेधुंकूगु दु । तर मधेशी जनअधिकार फोरम मवयेकं एमाले व कांग्रेस जक जानाः बहुमतीय सरकार दयेके फइ मखु । फोरमं धाःसा आः मेपिनिगु सरकारय् च्वं वनेगु पलेसा फयांफछि थम्हं हे सरकार दयेकेगु कुतः यानाच्वंगु दु । थुकिं यानाः बहुमतीय सरकार गठनया ज्या नं तुरुन्त जुइगु खने मदुनि ।
थज्याःगु अवस्थाय् माओवादीया वर्तमान कामचलाउ सरकार हे ताः ई सत्ताय् च्वंच्वनेमालीगु अवस्था वयेफु ।
