स्वंगूगु डिभिजनय् समारोहया तयारी तिव्र
माओवादी जनसेनायात औपचारीकरुपं सेना समायोजन विशेष समिति मातहत हयेत कन्हय् ग्वसाः ग्वयेत्यंगु समारोहया तयारी तच्वयेकूगु दु ।
चितवनया जुटपानीस्थित स्वंगूगु डिभिजन शक्तिखोरय् दुपिं माओवादी जनसेनात समारोहया तयारीया नितिं न्ह्यज्याःगु दु । विशेष समितिया वंगु सोमबाः च्वंगु बैठकं गृहमन्त्री भीम रावलया नायःसुइ माओवादी नेता वर्षमान पुन 'अनन्त' व कांग्रेस नेता रामशरण महत दुथ्याःगु स्वम्ह दुजः दुगु समारोह आयोजना समिति नीस्वंगु खः ।
समारोहया नितिं मञ्च निर्माण, लसकुस ध्वाखा निर्माण लगायतया फुक्क तयारी लिपांगु चरणय् थ्यंगु समितिं जानकारी ब्यूगु दु । कन्हय् न्हिनय्निसें न्ह्याइगु समारोहसं प्रधानमन्त्री माधबकुमार नेपाल, एकीकृत नेकपा माओवादीया नायः पुष्पकमल दाहाल 'प्रचण्ड', राजनीतिक दलया शीर्ष नेता, प्रधान सेनापति छत्रमानसिंह गुरुङलिसे प्यंगुलिं सुरक्षा निकायया प्रमुख, कुटनीतिक नियोगया प्रतिनिधि लगायतया ब्वति दइगु नापं जानकारी ब्यूगु दु ।
ज्याझ्वलय् प्रधानमन्त्री नेपालं शिविरय् नेपाःया राष्ट्रिय ध्वाँय् ब्वयेकाः जनसेना विशेष समिति मातहत वःगु घोषणा याइ । विशेष समारोहलय् जनसेनां पाहाँपिंत सलामि बिइगु, मार्चपास, सैन्य अभ्यास व रणकौशल न्ह्यःब्वइगु सैन्य ईञ्चार्ज वर्षमान पुन 'अनन्तं' जानकारी बियादीगु दु । राष्ट्रसंघीय मिसन अनमिनया ई क्वचाये छन्हु न्ह्यः वंगु शुक्रबाः प्रधानमन्त्री माधवकुमार नेपाल व माओवादी नायः प्रचण्डदथुइ शिविरयात विशेष समिति मातहत हयेगु व अनमिनया फुक्क भाला समितिं कायेगु सहमति जूगु खः ।
