कडा सुरक्षादथुइ एसएलएसीया न्ह्यसः पौ छापय् यायेगु ज्या न्ह्यात

जनक शिक्षा सामग्री केन्द्र लिमिटेड सानोठिमीं एसएलसी न्ह्यसः पौ छापय् यायेगु प्रारम्भिक ज्या न्ह्याकूगु दु । ख्वपया सानोठिमीइ दुगु केन्द्रया मू ज्याकुथिइ दुगु स्वंगू शैक्षिक सेक्युरिटी प्रेसय् न्ह्यसः पौ छापय् यायेगु ज्या न्ह्याःगु खः । न्ह्यसः पौ छापय् यायेगु नितिं नेपाली सेना, सशस्त्र प्रहरी व नेपाल प्रहरीया स्वंगू सुरक्षा घेरा दयेकूगु दु । न्ह्यसः पौ छापय् यायेत थ्यंमथ्यं स्वीन्याम्ह कर्मचारी गोप्य शाखाय् छ्वःगु खः ।

गोप्य शाखाय् छ्वःपिं कर्मचारीतय्त छापय् यायेगु ईतक्क लच्छितक्क छेँय् मछ्वयेगु, छेँजःया दुजःतय्त नापं स्वापू तयेके मबीगु व मोबाइल फोन छ्यले मबीकेगु केन्द्रया प्रवक्ता मनोहर लामिछानें जानकारी बियादिल । न्ह्यसः पौं छापय् यायेगु ज्याया निरन्तर अनुगमनया नितिं छापय् जुइगु क्षेत्रय् झिंखुगू सिसिटिभी क्यामरा जडान यानातःगु दु । छापय् यायेगु ज्वःछि परीक्षा नियन्त्रक, उपनियन्त्रक, केन्द्रया प्रबन्ध सञ्चालक, कर्मचारीत व सुरक्षाकर्मीतय्त नापं सेक्युरिटी प्रेसय् हे च्वनेगु व्यवस्था मिलय् यानातःगु दु । थ्व स्वयाः न्ह्यः भारतय् न्ह्यसः पौ छापय् याकाः वयाच्वंगु खः । भारतय् न्ह्यसः पौ छापय् यायेबलय् करौडौं धेबा पिहांवनीगु व आर्थिक अनियमितता जुइवं न्हापांगु खुसिइ नेपालय् हे न्ह्यसः पौ छापय् यायेत्यंगु खः । थुगु दा एसएलसी परीक्षा वइगु चैत १० गतेनिसें न्ह्याइगु जानकारी ब्यूगु दु ।