माओवादी केन्द्रीय समिति बैठक थौं नं निरन्तर

कार्यकर्ता प्रशिक्षणया झ्वलय् खनेदुगु आन्तरिक बिवाद मिलय् यायेत विहीवाःनिसें न्ह्याःगु एकीकृत नेकपा माओवादीया केन्द्रीय समितिया बैठक शुक्रवाः नं न्ह्याःगु दु । पार्टी मू ज्याकू कोटेश्वर पेरिसडाँडाय् न्ह्याःगु बैठकय् विहीवाः न्वंवाये ल्यंदनीपिं दुजःतय्सं शुक्रवाः थःथःगु बिचाः तयेगु ज्या जूगु खः ।

प्रवक्ता दीनानाथ शर्मां आन्तरिक संगठनात्मक समस्याया विषयसं व न्वकु डा. बाबुराम भट्टराईया ब्यागलं मतयात गुकथं क्वय्तक्क यंकेगु धइगु विधिबारे सहलह जुयाच्वंगु जानकारी बियादिल । बैठकं कार्यदिशाय् थुइकेगुलिइ एकरुपता हयेगु माओवादीया धापू दु । येँया भृकुटीमण्डपय् जूगु प्रशिक्षणयात बहिष्कार यायेगु गलत जूगु नायः प्रचण्ड व न्वकु मोहन वैद्य किरणया धापूप्रति न्वकु भट्टराईं असहमति प्वंकूगु खः ।