बाबुराम जूसा कांग्रेस व एमालेया समर्थन?
येँ (सन्ध्या टाइम्स)/एनेकपा (माओवादी) दुने अध्यक्ष प्रचण्ड व उपाध्यक्ष डा. बाबुराम भट्टराई दथुया कचवं देय्या न्हूम्ह प्रधानमन्त्री ल्ययेगु विवादलिसे नं स्वाना वःगु खँ सीदुगु दु ।
माओवादी सूत्रं बिउगु जानकारी कथं उपाध्यक्ष भट्टराईनं यदि थः प्रधानमन्त्रीया उम्मेदवार जुल धाःसा कांग्रेस व एमालें नं समर्थन याये धयाहःगुलिं थःपिनि हे नेतृत्वय् सरकार गठन यायेमाली धकाः प्रस्ताव तयेधुंकूगु दु।
अध्यक्ष प्रचण्डं एमालेया झलनाथ खनालयात समर्थन यायेमाः धाःगु खँयात नं डा. बाबुरामं विरोध यानादीगु दु। यदि थःपिनि पार्टीया नेतृत्वय् हे सरकार दयेकेगु सम्भावना दुसा छाय् कर्पिन्त समर्थन याः वनेगु धइगु तर्क बाबुरामया खः ।
सूत्रया कथं यदि थःपिनि नेतृत्वय् सरकार दयेकेगु सम्भावना दयेक दयेकं नं पार्टीं झलनाथयात समर्थन यायेगु धकाः निर्णय यात धाःसा थःपिंसं उकियात नं विरोध यायेगु ख्याच्वः नं डा. बाबुरामं बियादीगु दु ।
सूत्रया कथं थौंकन्हय् डा. बाबुराम भट्टराईयात भोजपुरा, अवध स्वायत्त प्रदेश लागाया सभासद्तय्सं साथ बियाहःगु दु। मधेश प्रदेश दुने लाःगु थ्व क्षेत्रया आपालं सभासद्त आकाझाकां बाबुरामया पक्षय् वंगु खँयात प्रचण्ड पक्षं शंकास्पद मिखां स्वया हःगु खँ सूत्रं धाःगु दु। थौंकन्हय् नेपाःया मधेशवादी पार्टी व सभासद्तय्त छथाय् तयेगु लागिं भारतं म्हिताच्वंगु कासाया हे थ्व नं छगू अंग जकं मखु ला धकाः प्रचण्ड पक्षं स्वयाहःगु खँ नं धाःगु दु ।
