थक्वातय् नेपाः पार्टीया बुन्हि
येँ (सन्ध्या टाइम्स)/नेपाः राष्ट्रिय पार्टीया स्थापना दिवसया लसताय् म्हिगः पार्टीया पश्चिम लागा थक्वाः कमिटीया ग्वसालय् छगू तुच्चा व आमसभा जुल। सभाय् पार्टी अध्यक्ष डा. केशवमान शाक्यं थः हे शासक व थः हे प्रशासक जुइत हे नेवाःतय्सं नं राजनीति यायेमाः धयादिल ।
सभाय् उकुन्हुतिनि क्वचाःगु एशियन कासाय् नेपाःपाखें छगूयां छगू जक पदक त्याकेत ताःलाःम्ह कासामि दिपक महर्जनयात दसिपौ लःल्हासें सम्मान याःगु खः। अन न्ववासें कासामि महर्जनं थः नेवाः काय्मचा जूगुलिं राष्ट्रं गुलि सम्मान यायेमाःगु खः मयाःगु खँ कनादिल ।
नेपाः राष्ट्रिय पार्टीया सभासद बुद्ध साय्मिं संबिधानसभाय् म्हितागु भूमिका कनादिलसा न्वकु नरेशवीर शाक्यं नं नेपाः राष्ट्रिय पार्टी स्वनेमाःगु आवश्यकता कुलादिल।ज्याझ्वः पार्टीया केन्द्रिय दुजः विष्णु श्रेष्ठया सभापतित्वय् जूगु खः। बुन्हिया झ्वलय् थौं येँया तख्तिइ व कन्हय् यलया तःबाहालय् नं ज्याझ्वः याइगु ग्वसाः दु ।
